ভাৰতীয় মহাকাশ গৱেষণা সংস্থা (ISRO)–এ মংগল গ্ৰহলৈ আন এক মহাকাশ যান প্ৰেৰণৰ প্ৰস্তুতি চলাইছে। ইছৰোৱে নিজৰ প্ৰথম চেষ্টাতে ৰঙা গ্ৰহৰ কক্ষপথত এখন মহাকাশ যান সফলভাৱে স্থাপন কৰি ইতিহাস ৰচনা কৰাৰ ৯ বছৰ পিছত পুনৰ আন এখন মংগলযান প্ৰেৰণৰ প্ৰস্তুতি চলাইছে। ইছৰোৰ এগৰাকী বিষয়াই কয় যে ভাৰতৰ দ্বিতীয় মংগল মাৰ্চ অৰ্বিটাৰ মিছন–২য়ে চাৰিটা পেলোড লৈ যাব। হিন্দুস্তান টাইমছৰ এক ৰিপ’ৰ্ট অনুসৰি, মংগলযান–২ (Mangalyaan-2)ৰ বৈজ্ঞানিক উপকৰণে মংগল গ্ৰহৰ বিভিন্ন দিশ পৰীক্ষা কৰিব। যাৰ ভিতৰত আছে আন্তঃগ্ৰহীয় ধূলি, মংগল গ্ৰহৰ বায়ুমণ্ডল আৰু পৰিৱেশ।
ইছৰোৰ এগৰাকী বিষয়াই কয়, ‘এই সকলো পেলোড বিকাশৰ বিভিন্ন স্তৰত আছে।’ ৯ বছৰ পূৰ্বে ২৪ ছেপ্টেম্বৰত ভাৰতে নিজৰ প্ৰথম প্ৰচেষ্টাতে মংগলৰ কক্ষপথত প্ৰৱেশ কৰি ইতিহাস ৰচনা কৰিছিল। এয়া এক এনেকুৱা উপলব্ধি আছিল, যিটো সেই সময়ত কোনো মহাকাশ গৱেষণা সংস্থাই অৰ্জন কৰিব পৰা নাছিল।
